💠 బ్రహ్మోత్సవాలలో నాలుగవనాటి రాత్రి మలయప్పస్వామి శ్రీదేవి భూదేవులతో కూడి సర్వభూపాలవాహనం పై తిరుమల మాడవీధులలో విహరిస్తాడు.
💠 ఇది ఒక సువర్ణ మండపం.
రాత్రి పూట విద్యుద్దీపకాంతులలో మిరుమిట్లు గొలిపే బంగారుమండపంలో స్వామి దేవేరులతో దర్శనమిస్తాడు.
💠 వేంకటేశ్వరుడు సర్వభూపాల మౌళి మణిరంజిత పాదపీఠం గలవాడు.
స్వామి సర్వభూపాలురకు చక్రవర్తిసార్వభౌముడు కనుక ఉదయాస్తాచల సేతుశీతనగ మధ్యలో నున్న రాజులందరు ఈ ఉత్సవంలో వాహనంగా పాల్గొంటారు ..భక్తి ప్రపత్తులతో.
సర్వభూపాలురలో అష్టదిక్పాలకులయిన దేవతలు కూడ ఉన్నారు.
" సేవాపరాః శివసురేశ కృశాను ధర్మ రక్షోంబునాథ పవమాన ధనాధినాథాః బద్ధాంజలిప్రవిలసన్నిజ శీర్షదేశాః శ్రీ వేంకటాచలపతే తవ సుప్రభాతమ్||
💠 అష్ట దిక్పాలకులయిన శివుడు, ఇంద్రుడు, అగ్ని, యముడు, నిరృతి, వరుణుడు, వాయువు, కుబేరుడు నిన్ను సేవించుటకై తలపై చేతులు జోడించి వేచియున్నారు. ఓ వేంకటాచలపతీ! నీకు సుప్రభాతమగుగాక! దేవతలైన దిక్పాలకులే స్వామిని సేవిస్తున్నారు. మానవపాలకులు వేంకటేశ్వరస్వామిని సేవించుట అబ్బురం కాదుగదా!
💠 రాజులు ప్రజలకు రక్షకులు, శ్రీవేంకటేశ్వరస్వామి ప్రజలకు, రాజులకు రక్షకుడు. సర్వభూపాలురకు అధిపతి. కనుక నేడు సర్వభూపాలురు స్వామికి వాహనంగా నిలిచి సేవిస్తున్నారు.
💠 భక్తులారా! మీరు మీ హృదయాన్ని స్వామికి వాహనంగా (నిలయంగా) చేసి, స్వామిని సేవించి తరించండని
బోధిస్తున్నాడు.
💠 సర్వభూపాలవాహనంలో స్వామి కాళియ మర్దనం చేస్తున్న కృష్ణునిరూపంలో దర్శనమిస్తాడు.
(ఈ అలంకారం మారుతుంటుంది).
No comments:
Post a Comment