గణనాయకాష్టకం..!!

ఏకదంతం మహాకాయం తప్తకాంచన సన్నిభమ్ |
లంబోదరం విశాలాక్షం వందేఽహం గణనాయకమ్
 

మౌంజీ కృష్ణాజినధరం నాగయజ్ఞోపవీతినమ్ |
బాలేందుశకలం మౌళౌ వందేఽహం గణనాయకమ్
 
చిత్రరత్నవిచిత్రాంగచిత్రమాలావిభూషితమ్ |
కామరూపధరం దేవం వందేఽహం గణనాయకమ్
 
గజవక్త్రం సురశ్రేష్ఠం కర్ణచామరభూషితమ్ |
పాశాంకుశధరం దేవం వందేఽహం గణనాయకమ్

మూషకోత్తమమారుహ్య దేవాసుర మహాహవే |
యోద్ధుకామం మహావీర్యం వందేఽహం గణనాయకమ్
 
యక్షకిన్నరగంధర్వసిద్ధవిద్యాధరైస్సదా
స్తూయమానం మహాబాహుం వందేఽహం గణనాయకమ్
 

అంబికాహృదయానందం మాతృభిఃపరివేష్టితమ్ |
భక్తప్రియం మదోన్మత్తం వందేఽహం గణనాయకమ్

సర్వవిఘ్నకరం దేవం సర్వవిఘ్నవివర్జితమ్ |
సర్వసిద్ధి ప్రదాతారం వందేఽహం గణనాయకమ్

గణాష్టకమిదం పుణ్యం యః పఠేత్సతతం నరః |
సిద్ధ్యంతి సర్వకార్యాణి విద్యావాన్ ధనవాన్ భవేత్...