సువర్చలా కల్యాణం.. హనుమత్ కల్యాణం సందర్భంగా ప్రత్యేకంగా..

లోహాన్ని ఒరిపిడి పెట్టినట్లు సూర్యదేవుని దేహానికి ఒరిపిడి కలిగించి, ఆయన తేజస్సును కొంత తగ్గించాడు విశ్వకర్మ. ఆ తేజస్సు నుంచే విష్ణువుకు చక్రము, శివునికి త్రిశూలం మొదలైన ఆయుధాలను విశ్వకర్మ తయారుచేశాడు. ఇంకా కొంత సూర్యుని వర్ఛస్సు మిగిలింది. దానికి బ్రహ్మదేవుడు ప్రాణప్రతిష్ఠ చేశాడు. శక్తి స్త్రీస్వరూపం కాబట్టి ఆడపిల్ల అయింది. ఆ సూర్యవర్ఛస్సుకు సువర్చస్సు - సువర్చల అని పేరు పెట్టాడు. ఈ సుగుణవతి ఎవరికి భార్య అవుతుంది? అని ఇంద్రాదులు ప్రశ్నించినప్పుడు... "సూర్యుని ఫలమనే భ్రాంతితో పట్టబోయిన వానికి ఆమె భార్య కాగలద"ని సమాధానం చెప్పాడు. ఆయనే హనుమంతుడని అందరికీ తెలిసిన విషయమే. హనుమంతుని బుద్ధి, విద్య, బలపరాక్రమాలు చూచి మెచ్చిన సూర్యభగవానుడు తన కుమార్తె అయిన సువర్చలను హనుమంతునకు ఇచ్చి వివాహం చేయదలచాడు. కానీ హనుమంతుడు బ్రహ్మచర్య వ్రతం పాటించదలిచానని చెప్పాడు. నీ బ్రహ్మచర్య నిష్ఠకు భంగం కాని రీతిలో ఆమెను స్వీకరించు అంటూ సూర్యభగవానుడు జ్యేష్ఠ శుద్ధ దశమినాడు సువర్చలా హనుమంతులకు కల్యాణం చేశాడు. రామాయణంలో హనుమంతుని కల్యాణం విషయం లేదు. పరాశర సంహిత వంటి గ్రంథాలలో కనిపిస్తుంది. హనుమంతుడు బ్రహ్మచారి అంటారు. ఈ వివాహం ఎలా జరిగిందనేది మరో ధర్మసందేహం. బ్రహ్మచర్యం నాలుగురకాలు. గాయత్రం, బ్రాహ్మం, ప్రాజాపత్యం, బృహన్ అని వాటికి పేర్లు. భార్యతో నియమపూర్వక జీవితం గడిపేవారిని ప్రాజాపత్య బ్రహ్మచారులంటారు. బ్రహ్మచర్య నియమాలను సరిగా అర్థం చేసుకోగలగాలి. హనుమంతుడు భవిష్యద్రృహ్మ. ఆయన బ్రహ్మస్థానం పొందిననాడు సువర్చలాదేవి సరస్వతీ స్థానం పొందుతుంది. దేవతల భార్యలంటే అర్ధం వారి శక్తులే. బ్రహ్మచర్య నిష్ఠాగరిష్ఠునికి ఉండే శక్తి వర్ఛస్సు అని పేరు. దానినే బహిర్ముఖంగా సువర్చలా దేవిగా భక్తులు ఆరాధిస్తారు.