అయ్యప్ప జయంతి శుభాకాంక్షలు..ఈరోజు అయ్యప్ప స్వామి ఉత్తరా నక్షత్ర పూజ

అయ్యప్ప జయంతి శుభాకాంక్షలు..

ఈరోజు అయ్యప్ప స్వామి  ఉత్తరా నక్షత్ర పూజ...

శ్రీ హరిహర సుతుడైన శ్రీ అయ్యప్ప స్వామి వారి జన్మదినం ఏటేట ఫాల్గుణ మాసం , పౌర్ణమి తిధి , ఉత్తరా నక్షత్రం (పంగుణి ఉత్తరం) నాడు వస్తుంది. 

ఈ దినం శబరిమలలో అష్టాదశ  సోపానాలపై విరాజమానమై ఉన్న శ్రీ అయ్యప్ప స్వామి వారికి ఏకాదశ రుద్రాభిషేకం , మరియు విశేషపూజారాధనలు వైభవంగా జరుపుతారు. 

దీనిని *'కళ్యాణ వ్రతం'* అని కూడా అంటారు.

మీనాక్షీ సుందరేశ్వరుల కళ్యాణం , గోదా (ఆండాళ్) కళ్యాణం , వల్లీ , సుబ్రహ్మణ్యుల కళ్యాణం , అర్జునుని జన్మదినం , పరమేశ్వరుడు మన్మథునికి పునర్జన్మనిచ్చిన దినం ఇవన్నీ ఉత్తరానక్షత్రం

నాటి విశేషాలేనని పురాణాలు పేర్కొంటున్నాయి.

భక్తులు శ్రీ రామనవమి పర్వదినాన శ్రీమద్రామయణం లోని శ్రీ రామ జనన ఘట్టాన్ని

పారాయణం చేసేలా , గోకులాష్టమి పర్వదినాన శ్రీ మద్భాగవతం లోని శ్రీ కృష్ణ పరమాత్మ

అవతార ఘట్టాన్ని పారాయణం చేసేలా శ్రీ శాస్తావారి అవతారదినమైన ఉత్తరా నక్షత్రదినాన ,

స్కాంధపురాణంలోని శ్రీ హరిహరపుత్ర అవతార ఘట్టాన్ని పారాయణ చేయవచ్చుననీ , 

ఈశ్లోకాలు పారాయణం చేసేవారికి , సకాలంలో వివాహం , పుత్ర సంతాన ప్రాప్తి , జీవిత సుఖశాంతులు  మున్నగు శుభ ఫలితాలను ఆ అయ్యప్ప స్వామి వారు ప్రసాదిస్తారనీ పలుమార్లు శబరిమల  యాత్ర చేసిన తమిళనాడు తిరునల్వేలికి చెందిన బ్రహ్మశ్రీ ఆండి వాద్యార్ గురుస్వామి గారు  చక్కగా తమ అభిప్రాయాన్ని సెలవిచ్చియున్నారు. 

ఏకాదశి , శనివారాలు , కృత్తికా నక్షత్ర దినాలలో ఉపవాస వ్రతమున్నట్టే తమిళనాడులో పలుప్రాంతాలలో భక్తులనేకులు అనాదిగా ,

ప్రతి మాసం ఉత్తరానక్షత్ర వ్రతాలు , పూజలు , భజనలు చేసే ఆచారమున్నది. 

మన రాష్ట్రంలో  కూడ పలు ప్రాంతాలలోను కొన్నిదేవాలయాలలోను ఉత్తరా నక్షత్ర మాస పూజలు నిర్వహిస్తున్నారని తెలుస్తున్నది.

ఈ ఉత్తరా నక్షత్ర ఉపవాసవ్రతం , ఆచరించడానికి మాలధారణ చేయనవసరం లేదు.

ఈ వ్రతాన్ని ఏ వయసులోనున్న స్త్రీలైనా చేయవచ్చును. ఆ శబరిగిరి నాథుని పై సంపూర్ణ  విశ్వాసముంచి వ్రతం చేయడమే ముఖ్యం.

 సంతానం లేనివారికి సత్సంతానం ,

అవివాహితులకు వివాహం , నిరుద్యోగులకు ఉద్యోగం , అనారోగ్యుల కారోగ్యం , వారి వారి

కోరికలను కోరినంతగా ఆ స్వామి అనుగ్రహం పొందవచ్చును. 

దేశవ్యాప్తంగా ఈ వ్రతాన్ని

అనుష్ఠించిన భక్తులనేకులు , సత్ఫలితాలనేకం పొందిన గాథలు ఉన్నాయి. ప్రత్యేకంగా , రాష్ట్ర

వ్యాపిత అయ్యప్ప దేవాలయ నిర్వాహకులు శ్రీ స్వామి వారి జన్మ నక్షత్ర పూజావ్రతం *(ఉత్తరా నక్షత్ర వ్రతం)* లోని పరమార్ధ తత్వాన్ని , తమదేవాలయానికి వచ్చే భక్తులకు తెలిపి , 

వారిని ఉత్సాహ పరచి ఉత్తరా నక్షత్ర దినం నాడు అయ్యప్ప ఆలయాలలో వారిచే పారాయణ ,

విశేషపూజలు నిర్వహిస్తే దీనికి మరింత ప్రచారం లభించి మరింత భక్తులు ధన్యులౌతారు.

ఇది కేవలం భక్తులకు మాత్రమే కాక ఆయా దేవాలయాల్లో కొలువై వున్న మూర్తి మంతానికి

కూడా చైతన్యాభి వృద్ధి కలుగచేస్తుందనటం అతిశయోక్తికాదు..