17వ మహర్షి కచ మహర్షి గురించి తెలుసుకుందాం
🌿అంగిరస మహర్షికి శ్రద్ధ అనే భార్య యందు పుట్టినవాడు బృహస్పతి . బృహస్పతికి పుట్టుకతోనే లోకాతీతమైన బుద్ధి వుండేది .
🌸 బృహస్పతి శాస్త్రవేది , దేవగురువు , ఇంద్రుడికి కూడా ధర్మాలు బోధించాడు . మాంధాతకి గోపూజని గురించి చెప్పాడు .
🌿మనువుకి జ్ఞాన బోధ చేశాడు . భరద్వాజుడి పుట్టుకకి కారణమయ్యాడు .
🌸బృహస్పతి తారని పెళ్ళి చేసుకున్నాడు . ఆమె ద్వారా కచుడనే కొడుకుని పొందాడు .
🌿కచుడు పెరిగి పెద్దవాడయ్యాడు . మన కచుడు బృహస్పతి కొడుకన్న మాట ! ఆ సమయంలో శుక్రాచార్యుడు మృతసంజీవనీ విద్యని నేర్చుకుని రాక్షసుల్ని బ్రతికిస్తున్నాడు .
🌸 వృషపర్వుడనే రాక్షస రాజు శుక్రాచార్యుణ్ణి తన దగ్గరే ఉండమన్నాడు . ఇద్దరూ కలిసి రాక్షసులకి చావు లేకుండా చేస్తున్నారు .
🌿దేవతలు ఏంచెయ్యాలా అనే ఆలోచనలో పడ్డారు . ఎలాగయినా మృత సంజీవని విద్యని శుక్రాచార్యుడి నుండి పొందాలని బృహస్పతి కొడుకయిన కచుణ్ణి పంపేందుకు నిర్ణయించుకున్నారు .
🌸కచుడు దైవకార్యం కాబట్టి ఆపనికి అంగీకరించి బయలుదేరి శుక్రాచార్యుడి దగ్గరికి వెళ్ళి సాష్టాంగ నమస్కారం చేసి ,
🌿ఆచార్యా ! నేను బృహస్పతి కొడుకుని . మీదగ్గర విద్య నేర్చుకోవాలని వచ్చానని చెప్పాడు . నన్ను మీ శిష్యుడిగా అనుగ్రహించమని ప్రార్ధించాడు కచుడు .
🌸దేవతలవైపు వాడయినా చిన్నవాడు , సుకుమారుడు , ప్రకాశవంతుడు , ప్రశాంతుడు , అంతేకాక బృహస్పంతటి గొప్పవాడికి కొడుకు అయిన తనని అడుగుతున్నప్పుడు
🌿 కాదని అనలేక ఆలోచించి , చివరికి కచుడిని శిష్యుడిగా అంగీకరించాడు శుక్రాచార్యుడు .
🌸గురు సేవ చేస్తూ , గురువుగారి కూతురయిన దేవయాని ఏంచెప్తే అది చేస్తూ గురువుగారికి ప్రియ శిష్యుడు , దేవయానికి ప్రియ మిత్రుడూ అయ్యాడు కచుడు .
🌿 ఇది చూసి రాక్షసులకి ఈర్ష్యగా ఉండేది . వాళ్ళకి బృహస్పతి అన్యాయం చేస్తున్నాడని కచుడిని ఎలాగయినా చంపెయ్యాలని నిర్ణయించుకున్నారు .
🌸 ఒకనాడు కచుడు ఆవుల్ని తోలుకుని వస్తుంటే అతన్ని చంపి శవాన్ని చెట్టుకి కట్టేశారు .
🌿అది చూసి దేవయాని ఏడ్చి , అతన్ని బ్రతికించమని తండ్రిని అడిగింది . శుక్రుడు కచుడిని బ్రతికించాడు .
🌸ఇలా కాదని కచుడిని చంపి , కాల్చి బూడిద చేసి మధువులో కలిపి శుక్రాచార్యుడితో తాగించారు .
🌿 రాక్షసులు . మళ్ళీ దేవయాని తన స్నేహితుణ్ణి బ్రతికించమని తండ్రిని ప్రారించింది .
🌸శుక్రాచార్యుడు ఎక్కడ వెతికినా తన దివ్యదృష్టికే కచుడు కనపడలేదు . చివరకి తన కడుపులోనే వున్నాడని తెలుసుకుని
🌿కడుపులోవున్న కచుణ్ణి కడుపులోనే బ్రతికించాడు . కచుడు గురువు గారూ ! నేనెలా బయటికి రావాలి ?
🌸నేను బయటకి వస్తే మీరు చచ్చిపోతారుకదా ! అన్నాడు . గురువు , " వత్సా ! నేను నీకు మృతసంజీవని విద్య నేర్పిస్తే నువ్వు బయటకు వచ్చాక నన్ను బ్రతికిస్తావు .
🌿 కానీ , దానివల్ల నన్నే నమ్ముకున్న రాక్షసులకి కీడు జరుగుతుంది . విద్య , వినయం , గురుభక్తి వున్న నీకు నేర్పించకుండా దాచుకుంటే నేను గురువుని అవను .
🌸 అది అధర్మమవుతుంది . ఏది ఏమైనా కానీ , నీకు మృతసంజీవని విద్య నేర్పుతాను . నువ్వు బయటకి వచ్చి నన్ను బ్రతికించమన్నాడు శుక్రాచార్యుడు .
🌿 లోకోత్తరమైన మృతసంజీవని విద్యని , లోకోత్తరుడైన కచుడికి , లోకోత్తర పద్ధతిలో లోకోత్తరుడైన గురువు శుక్రాచార్యుడు నేర్పించాడు .
🌸కచుడు బయటకి వచ్చి , గురువుగార్ని బ్రతికించాడు . ఆ గురుశిష్యుల మీద పుష్పవర్షం కురిసింది . దేవయాని ఎంతో ఆనందపడింది .
🌿విద్యా విషయంలో శత్రు , మిత్ర భేదభావం చూపించకుండా శిష్యుడికి విద్య నేర్పించి మహా పురుషుడయ్యాడు శుక్రాచార్యుడు .
🌸 కచుడు దేవలోకానికి వెడుతూ దేవయానికి చెప్పాడు . దేవయాని కచుణ్ణి తనను పెళ్ళిచేసుకోమని అడిగింది .
🌿 గురువుగారి కూతుర్ని చేసుకోవడం అధర్మమని హితవు చెప్పాడు కచుడు . దేవయాని " నువ్వు నేర్చుకున్న విద్య నీకు పనిచెయ్య " దని శపించింది కచుణ్ణి ,
🌸కచుడు నేను నేర్చుకున్నది నా కోసం కాదనీ నా వలన గ్రహించిన వాళ్ళకి పని చేస్తుందని చెప్పి ,
🌿నన్ను కారణం లేకుండా శపించావు గనుక నిన్ను బ్రాహ్మణుడు పెళ్ళి చేసుకోకుండా శపిస్తున్నానని చెప్పి వెళ్ళిపోయాడు .
🌸అతను దేవతల నివాసానికి బయలుదేరాడు, అక్కడ అతను చనిపోయిన దేవతలను పునరుద్ధరించడానికి నైపుణ్యాన్ని ఉపయోగిస్తాడు.
🌿మృతసంజీవని విద్య నేర్చుకుని వచ్చాక కచుణ్ణి చూసి బృహస్పతి , దేవతలు సంతోషించారు .
🌸ఇదండీ కచ మహర్షి చరిత్ర
No comments:
Post a Comment