77వ శుక మహర్షి గురించి తెలుసుకుందాం
🌸 మన భారతీయ బ్రహ్మర్షులలో శుక మహర్షికి ఒక ప్రత్యేకమైన స్థానం ఉంది. సాధారణంగా శుక మహర్షి అని వినగానే శుక్ర మహర్షి అనుకుంటారు చాలామంది.
🌿 కాని ఈ శుక మహర్షి పేరు వినగానే మనందరికీ గుర్తుకు వచ్చేది శ్రీ భాగవతం. తన తండ్రి అయిన వేదవ్యాసుడు రాసిన భాగవతాన్ని పరీక్షిత్తు మహారాజుకు ఏడూ రోజుల పాటు వినిపిస్తాడు శుకుడు.
🌸 ఇక శుక మహర్షి పుట్టుక విషయానికి వస్తే పూర్వం వేదవ్యాస మహర్షి ' కర్ణికారం ' అనే వనంలో పరమేశ్వరుణ్ణి గురించి ఎన్నో వందల సంవత్సరాలు తపస్సు చేస్తాడు. శివుడు ప్రత్యక్షమయ్యి ఏం కావాలో కోరుకోమని అడిగితే..
🌿 నీటికి, గాలికి, ఆకాశానికి, భూమికి, అగ్నికి సమానమైన పంచభూతాలను పోలిన కొడుకు కావాలని వరం కోరుకుంటాడు..
🌸 ఆయన కోరుకున్నట్లుగానే ఘ్నతాచి అనే చిలుక రూపంలో వున్న అప్సరస కారణంగా శ్రీశుకుడు పుట్టాడు. శుక మహర్షి పుట్టినప్పుడు ఆకాశగంగ వచ్చి స్నానం చేయించింది. ఆకాశం నుంచి కృష్ణాజినం, దండం వచ్చాయి. దివ్య దుందుభులు మ్రోగాయి, దేవతలు గానం చేస్తూ, పుష్ప వర్షం కురిపించారు.
🌿 పార్వతీ సహితంగా పరమేశ్వరుడు వచ్చి ఉపనయం చేశాడు. ఇంద్రుడు కమండలం, దేవతలు ఎప్పుడూ మాయని దివ్య వస్త్రాలు ఇచ్చారు. శ్రీశుకుడికి పుట్టకతోనే వేదాలు వచ్చేశాయి. అయినా బృహస్పతి దగ్గర మిగిలిన విద్యలన్నీ నేర్చుకున్నాడు. అతడు తిరిగి తండ్రి దగ్గరకు వచ్చి ఉండిపోయాడు.
🌸 కొంతకాలం తర్వాత వ్యాసుడు తన కొడుకు శుకుణ్ణి మోక్ష మార్గం గురించి తెలుసుకోమని జనక మహారాజు దగ్గరకి పంపించాడు. కాని నడిచి మాత్రమే వెళ్ళమని చెప్పాడు వ్యాస మహర్షి తండ్రి చెప్పిన ప్రకారం శ్రీశుకుడు మిథిలా నగరానికి వెళ్ళాడు.
🌿 ద్వారపాలకులు మొదట లోపలికి పంపించలేదు, తర్వాత పంపారు. జనక మహారాజు మంత్రితో సహా ఎదురొచ్చి అర్ఘ్య పాద్యాలిచ్ఛి లోపలికి తీసుకెళ్ళాడు. బంగారు సింహాసనం మీద కూర్చోపెట్టి పూజచేశాడు.
🌸 జనక మహారాజుని మోక్షమార్గం గురించి చెప్పమన్నాడు శుక మహర్షి. జనకమహారాజు మోక్షమార్గం గురించి విఫులంగా శుక మహర్షికి చెప్పి పంపాడు. తర్వాత శుక మహర్షి తండ్రి దగ్గరే వుండి శిష్యులకి బోధించటం ప్రారంభించాడు.
🌿 శ్రీశుకుడు తండ్రి వలన కాలావయవ నిరూపణ, చతుర్యుగ ధర్మాలు, బ్రహ్మం, దాని విజ్ఞానం, సర్వ వర్ణ ధర్మాలు, దానగుణ ప్రాశస్త్యం, మైత్రి గుణ లాభం, ఇంద్రియ నిగ్రహం ఇలాంటివెన్నో నేర్చుకున్నాడు. తండ్రితో అన్ని విషయాల గురించి చెప్పించుకుని ఆచరించి బ్రహ్మర్షియై వెలిగాడు శుకుడు.
🌸 ఆత్మజ్ఞానంతో బాహ్య ప్రపంచం మర్చిపోయి శరీరం మీద దుస్తులు కూడా లేకుండా తిరుగుతుంటే అల్లరి పిల్లలు వెంటపడేవాళ్ళు. తక్షకుడి విషంతో ఏడు రోజుల్లో మరణించేలా శాపాన్ని పొందిన పరీక్షిత్తు దగ్గరకి శ్రీశుకుడు వెళ్ళి అతనికి ముక్తి కలిగేలా తన తండ్రి రాసిన భాగవత కథ వినిపించాడు.
🌿 మిగిలివున్న ఏడు రోజులు వేరేది ఆలోచించక భగవంతుడి యందే మనస్సుంచి ధ్యానం చెయ్యమని చెప్పి పరీక్షిత్తుకు బ్రహ్మలోకం కలిగేలా చేశాడు. శ్రీశుకుడు తండ్రి ఆశ్రమంలోనే వుండి సుమంతుడు మొదలైన వాళ్ళతో వేదాధ్యయనం చేస్తుండేవాడు.
🌸 కొంతకాలం తర్వాత మిగిలిన వాళ్ళందరు మూడు లోకాల్లోను వేదాలు విస్తరించేలా చెయ్యడం కోసం వెళ్ళారు. ఒకరోజు నారదుడు వ్యాస మహర్షి ఆశ్రమానికి వచ్చి ఎక్కడా వేదాధ్యయనం వినిపించడం లేదని అడిగాడు. వ్యాసుడు శిష్యులు లేకపోవడం వలన వినిపించడం లేదని చెప్పాడు.
🌿 నువ్వు, నీ కొడుకయినా అధ్యయనం చెయ్యండని చెప్పి శుకున్ని నీకేం కావాలో అడగమన్నాడు నారదుడు. ఈ లోకంలో పుట్టిన నాకు ఏది మంచో చెప్పమన్నాడు శుక మహర్షి. యోగసిద్ధి మంచిదని నారదుడు చెప్పగానే శుక మహర్షి ప్రదక్షిణం చేసి తండ్రికి చెప్పి కైలాస పర్వతం మీద తపస్సు చేసి యోగ సిద్ధి పొందాడు.
🌸 నారదుడు శ్రీశుకుణ్ణి చూడ్డానికి వెడితే అతనికి ఆత్మయోగం చెప్పి ఆకాశంలోకి ఎగిరిపోయాడు శుకుడు. మిగిలిన సిద్ధులు ఆశ్చర్యపోయారు. అలా వెళ్ళిపోతూ మృగాలికి, పక్షులకి, పర్వతాలకి తన తండ్రి వచ్చి శుకా! అని పిలిస్తే ఓయని పలకమని చెప్పాడు శుక మహర్షి.
🌿 శుకుడు ఆకాశ గంగ మీద ఆకాశంలో వెడుతూ వుంటే దాంట్లో స్నానం చేస్తున్న స్త్రీలు అతన్ని చూసి సిగ్గుపడలేదు, కాని అదే వ్యాసుడు వెడుతుంటే సిగ్గుపడ్డారు. అది చూసిన వ్యాసుడికి తనని చూసుకుని తనకే సిగ్గనిపించింది. ఎందుకంటే శ్రీశుకుడు పసిబిడ్డ మనసులాంటి మనసున్నవాడు, ఆడ, మగ ఎవరో తెలియనివాడు.
🌸 వ్యాసుడు శుకుడు కనిపించక శుకా ! అని పిలుస్తే ' ఓ'యని వినిపింపిందిట. ఇంతలో ఈశ్వరుడు వచ్చి బాధపడుతున్న వ్యాసుణ్ణి ఓదార్చి నీకు కావలిసనట్లే నీ కొడుకు చాలా గొప్పవాడయ్యాడు. ఇంకెందుకు బాధపడతావని నచ్చ చెప్పి పంపించాడు. ఇదే శుక మహర్షి కథ.!..
🌿 స్వస్తి
No comments:
Post a Comment