76వ మహర్షి సోదరులు - శంఖలిఖిత మహర్షుల గురించి తెలుసుకుందాం
🌸బహుదానదీ తీరంలో పవిత్రమైన ఒక ఆశ్రమంలో తపస్సంపన్నుడైన బ్రాహ్మణుడు ధర్మపత్నీ సమేతంగా ఉండేవాడు. వాళ్ళకి ఇద్దరు కొడుకులు కలిగారు.
🌿అందులో ఒకడికి జ్ఞానయోగాన్ని సూచించే శంఖం గుర్తు చేతిలో ఉంది. అందుకే అతడికి శంఖుడని పేరు పెట్టారు., రెండోవానికి నుదటి మీద తపస్సు, ధర్మం దీక్షగా కలవాడని తెలుస్తుండడం వల్ల అతనికి లిఖితుడని పేరు పెట్టారు.
🌸శంఖలిఖితులిద్దరూ చక్కగా పెరిగి పెద్దవాళ్ళయ్యాక ఉపనయనం చేసి తండ్రి వేదవేదాంగాలు నేర్పించాడు. వాళ్ళిద్దరు ఎంతో ప్రేమగా, రామలక్ష్మణుల్లాగా, సూర్యచంద్రుల్లాగా, అశ్వనీ దేవతల్లాగా వెలిగిపోతున్నారు.
🌿వాళ్ళిద్దరూ బ్రహ్మచర్యం తీసుకుని తల్లితండ్రుల అనుమతి తీసుకుని తపస్సు చేసుకుందుకు వెళ్ళారు. తపస్సులో వున్న వాళ్ళిద్దర్ని చూస్తుంటే సాక్షాత్కరించిన ధర్మదేవతలో, అవతారమెత్తిన ఆది విద్యలో అన్నట్లుండేవాళ్ళు.
🌸విశ్రాంతి సమయంలో ఇద్దరూ ఒకే చోట వుండి చక్కగా మాట్లాడుకుంటూ ఉండేవాళ్ళు. వాళ్ళెప్పుడూ అబద్ధమాడరు, ఆ పవిత్ర సోదరులకి తపస్సే ఇంద్రభోగం, మోక్షలక్ష్మీ వాళ్ళకి ధర్మపత్ని, ఆశ్రమంలో వుండే జంతు సంతానం వాళ్ళకి ఆత్మసంతానం.
🌿ఇలాంటి వాళ్ళిద్దర్ని చూసి దేవతలు మెచ్చుకుంటూ, గంధర్వులు ఆడుకుంటూ, కిన్నరులు పాడుకుంటూ వున్నారు. కొంతకాలం గడిచాక ఒకనాడు లిఖితుడు శంఖుడి ఆశ్రమానికి వచ్చాడు.
🌸కొంతసేపు కూర్చుని అక్కడ ఒక చెట్టుకి వున్న రెండు పండ్లు కోసుకుని తిని చెయ్యికడుక్కుని కూర్చున్నాడు. తర్వాత అన్న శంఖుడు వచ్చి జరిగింది తెలుసుకుని విచారంగా కూర్చున్నాడు . లిఖితుడు అన్నా! ఏమయింది అనడిగాడు. నా అనుమతి లేకుండా చెట్టు పండ్లు కోసుకు తిన్నావు.
🌿ఇంత బ్రహ్మజ్ఞానివి, ఇంత చిన్న తప్పు ఎందుకు చేశావు? దొంగతనానికి యమదండన తప్పదుకదా నీకు! నా చెట్టు పండ్లు కోశావు, నాకు నష్టం వచ్చిందని కాదు, ఎంతటి మునీశ్వరులైన ధర్మసంశయం కలిగినప్పుడు మనల్నే కదా అడుగుతున్నారు.
🌸అధర్మం మనం చేసినప్పుడు ధర్మం చెప్పే అధికారం మనకు వుండదు కదా అన్నదే బాధ అన్నాడు శంఖుడు. లిఖితుడు అన్నా! ఇప్పుడు నన్నేం చెయ్యమంటావో చెప్పు..!? నువ్వేం చెయ్యమన్నా చేస్తాను, నాకు ఏ శిక్ష విధించినా భరిస్తానన్నాడు.
🌿దొంగతనం చేసినవాడు రాజదండన పొందితే యమదండన పొందక్కర్లేదు. మన దేశపు రాజు సుద్యుమ్నుడు ధర్మ ప్రభువు. అతనికి జరిగింది చెప్పి శిక్ష అనుభవించి వచ్చెయ్యి అన్నాడు. లిఖితుడు అన్న పాదాలకి నమస్కారం చేసి రాజు దగ్గరికి బయల్దేరాడు.
🌸లిఖిత మహర్షి వచ్చాడన్న వార్త విన్న రాజు ఎదురెళ్ళి భయ భక్తులతో నమస్కారం చేసి లోపలికి తీసికెళ్ళి ఆయన పాదాలు పట్టుకుని తపోనిధీ! మీరిక్కడకు రావడం వల్ల నా జన్మ ధన్యమైంది. నా గృహం పావనమైంది, ఏం చెయ్యమంటారో ఆజ్ఞాపించండి అన్నాడు.
🌿జరిగిందంతా రాజుకి చెప్పి గురువు గారికి చెప్పకుండా చెట్టు పండ్లు తిన్నాను కనుక నేను దొంగని. నువ్వు రాజువి కనుక నన్ను శిక్షించమన్నాడు లిఖితుడు.
🌸అది విని రాజు మూర్ఛపోయాడు, మంత్రిగారు వచ్చి రాజుకి ఉపచారాలు చేశాడు. తెలివొచ్చిన తర్వాత రాజు మునీంద్రా! అంత తపశ్శాలివైన నిన్ను నేను దండించడమా!
🌿నిప్పుకి చెదలుపడ్డాయా? పరమ పుణ్యుడవయిన నీకు దొంగతన దోషమంటుతుందా? నేను ఆలోచించకుండా చెప్పింది చేస్తానని మాటిచ్చాను, అయ్యో ! ఎంతపని చేశాను ! అంటూ బాధపడ్డాడు.
🌸రాజా!., నువ్వు నా మాట వినివలసిందే.., ఇంక తప్పదు. దీనివల్ల నీకు ఏ పాపమూ రాదు అన్నాడు లిఖితుడు. రాజు మనస్సులో భగవంతుణ్ణి ధ్యానించి లిఖితుడి చేతులు నరికేసి కళ్ళనుంచి నీళ్ళు కారుతుంటే చేతులు జోడించి నిలబడ్డాడు.
🌿లిఖిత మహర్షి ఆనందంతో అన్నగారి దగ్గరికి పరుగెత్తి అన్నా ! మహారాజుతో దండితుణ్ణి అయ్యానని చెప్పి స్నానానికి వెళ్ళి అర్ఘ్యమివ్వడానికి చేతులులేవే అనుకుని నీళ్ళలో మునిగి లేచేసరికి చేతులు వచ్చేశాయి.
🌸శంఖుడు తమ్ముణ్ణి కౌగిలించుకుని లిఖితా! ఇది మన తపస్సు ప్రభావమే. ఇంక నువ్వెళ్ళి ఇంతకు ముందులాగే వుండమని చెప్పాడు.
🌿శంఖలిఖితులిద్దరూ గొప్ప స్మృతికర్తలు . “శంఖస్మృతి", "లిఖితస్మృతి", “శంఖలిఖితస్మృతి” ఇలా అనేక స్మృతులున్నాయి.
🌸ఆ అన్నదమ్ములిద్దరూ అన్యోన్యంగా వుండి బ్రహ్మచారులై, తపసిద్ధులై, స్మృతికర్తలు కూడా అయ్యారు. ఎంతోమంది అన్నదమ్ములకి వీళ్ళు మార్గదర్శకులు. ఇదే శంఖలిఖిత మహర్షుల కథ!!..
No comments:
Post a Comment