1)విత్తతర్షరహితైర్మనుజానాం సత్తమైరనిశసేవ్యపదాబ్జమ్ ।
చిత్తశుద్ధిమభిలిప్సురహం ద్రాక్ దత్తదేవమనిశం కలయామి ॥
2)కార్తవీర్యగురుమత్రితనూజం పాదనమ్రశిర ఆహితహస్తమ్ ।
శ్రీదముఖ్యహరిదీశ్వరపూజ్యం దత్తదేవమనిశం కలయామి ॥
3)నాకనాయకసమర్చితపాదం పాకచన్ద్రధర మౌల్యవతారమ్ ।
కోకబన్ధుసమవేక్ష్యమహస్కం దత్తదేవమనిశం కలయామి ॥
4)మూకపఙ్గు బధిరాదిమలోకాన్లోకతస్తదితరాన్విదధానమ్ ।
ఏకవస్తుపరిబోధయితారం దత్తదేవమనిశం కలయామి ॥
5)యోగదానత ఇహైవ హరన్తం రోగమాశు నమతాం భవసంజ్ఞమ్ ।
రాగమోహముఖ వైరినివృత్త్యై దత్తదేవమనిశం కలయామి ॥
6)జామదగ్న్యమునయే త్రిపురాయాః జ్ఞానఖణ్డమవబోధితవన్తమ్ ।
జామితావిదలనం నతపఙ్క్తేః దత్తదేవమనిశం కలయామి ॥
7)తారకం భవమహాజలరాశేః పూరకం పదనతేప్సితరాశేః ।
వారకం కలిముఖోత్థభయానాం దత్తదేవమనిశం కలయామి ॥
8)సత్యవిత్సుఖనిరన్తరసక్తం స్వాన్తమానతజనం విదధానమ్ ।
శ్రాన్తలోకతతితోషణచన్ద్రం దత్తదేవమనిశం కలయామి ॥
9)రక్షణాయ జగతో ధృతదేహం శిక్షణాయ చ దురధ్వగతానామ్ ।
ఋక్షరాజపరిభావినిటాలం దత్తదేవమనిశం కలయామి ॥
10)నవరత్నమాలికేయం గ్రథితా భక్తేన కేనచిద్యతినా ।
గురువరచరణాబ్జయుగే తన్మోదాయార్పితా చిరం జీయాత్
ఇతి శ్రీజగద్గురుశ్రీచన్ద్రశేఖరభారతీస్వామిపాదైః విరచితా శ్రీదత్తనవరత్నమాలికా సమాప్తా !!.
No comments:
Post a Comment