1) విత్తతర్ష రహితై ర్మనుజానాం సత్తమైరనిశసేవ్యపదాబ్జం!
చిత్తశుద్ధిమభి లిప్సురహం ద్రాక్ దత్తదేవమనిశం కలయామి!!
2) కార్తవీర్యగురు మత్రితనూజం పాదనమ్రశిర ఆహితహస్తం!
శ్రీదముఖ్య హరిదీశ్వరపూజ్యం దత్తదేవమనిశం కలయామి!!
3) నాకనాయక సమర్చితపాదం పాకచంద్రధర మౌల్యవతారం!
కోకబంధు సమ వేక్ష్య మహస్కం దత్తదేవమనిశం కలయామి!!
4) మూకపంగు బధి రాదిమలోకాన్లోకతస్తదితరాన్విదధానం!
ఏకవస్తుపరి బోధయితారం దత్తదేవమనిశం కలయామి!!
5) యోగదానత ఇహైవ హరంతం రోగమాశు నమతాం భవసంజ్ఞం !
రాగమోహముఖ వైరినివృత్త్యై దత్తదేవమనిశం కలయామి!!
6) జామదగ్న్య మునయే త్రిపురాయాః జ్ఞాన ఖండమవ బోధితవంతం!
జామితావిదలనం నతపంక్తేః దత్తదేవమనిశం కలయామి!!
7) తారకం భవ మహాజలరాశేః పూరకం పదన తేప్సితరాశేః !
వారకం కలి ముఖోత్థభయానాం దత్తదేవమనిశం కలయామి!!
8) సత్యవిత్సుఖ నిరంతరసక్తం స్వాంతమానతజనం విదధానం!
శ్రాంతలోకతతి తోషణచంద్రం దత్తదేవమనిశం కలయామి!!
9) రక్షణాయ జగతో ధృతదేహం శిక్షణాయ చ దురధ్వగతానాం!
ఋక్షరాజపరి భావినిటాలం దత్తదేవమనిశం కలయామి!!
10) నవరత్న మాలికేయం గ్రథితా భక్తేన కేనచిద్యతినా!
గురువర చరణాబ్జయుగే తన్మోదాయార్పితా చిరం జీయాత్!!
ఇతి శ్రీజగద్గురు శ్రీచంద్రశేఖరభారతీస్వామి విరచితా శ్రీదత్తనవరత్న మాలికా సమాప్తా!!
No comments:
Post a Comment