స్త్రీలకు ఉన్నట్లే పురుషులకూ ధర్మ శాస్త్రంలో తమ విధులున్నాయా?

మనకందరికీ స్త్రీలు ఎలా ఉండాలని ధర్మ శాస్త్రాల్లో చెప్పారో తెలుసు.

"కార్యేషు దాసి, కరణేషు మంత్రి, భోజ్యేషు మాతా, రూపేచ లక్ష్మీ, శయనేషు రంభ, క్షమయా ధరిత్రీ… "

పై శ్లోకానికర్ధం చాలా మందికి తెలుసు, అందుకే మళ్ళా వ్రాయడం లేదు.

ఇకపోతే పురుషులు ఎలా ఉండాలోనన్న విషయం కామందక నీతిశాస్త్రం లో చెప్పబడింది.

దానిగురించీ ఎంతమందికి తెలుసో నాకు తెలియదు.

కార్యేషు యోగ, కరణేషు దక్ష:

రూపేచ కృష్ణః క్షమయా తు రామః |

భోజ్యేషు తృప్తః సుఖదుఃఖ మిత్రం

షట్కర్మయుక్తః ఖలు ధర్మనాథః ||

(కామందక నీతిశాస్త్రం)

కార్యేషు యోగీ పనులు చెయ్యడంలో ఒక యోగి వలె, ప్రతిఫలాన్ని ఆశించకుండా చెయ్యాలి.

కరణేషు దక్షః కుటుంబాన్ని నడపడంలో, కార్యాలను నిర్వహించడంలో నేర్పుతో, సంయమనంతో వ్యవహరించాలి. సమర్ధుడై ఉండాలి.

రూపేచ కృష్ణః రూపంలో కృష్ణుని వలె ఉండాలి. ఇక్కడ రూపం అంటే... బాహ్య రూపం కాదు. మానసికంగా ఎల్లప్పుడూ ఉత్సాహంగా, సంతోషంగా ఉండాలి.

క్షమయా తు రామః ఓర్పులో రామునిలాగా ఉండాలి. పితృవాక్యపరిపాలకుడైన రాముని వలె క్షమించేగుణాన్ని కలిగిఉండాలి.

భోజ్యేషు తృప్తః భార్య/ తల్లి వండినదాన్ని సంతృప్తిగా (వంకలు పెట్టకుండా) భుజించాలి.

సుఖదుఃఖ మిత్రం సుఖదుఃఖాలలో కుటుంబానికి మిత్రుని వలె అండగా ఉండాలి. మంచి చెడ్డలలో పాలు పంచుకోవాలి.

ఈ షట్కర్మలు - (ఈ ఆరు పనులు) సక్రమంగా చేసే పురుషుడు ఉత్తమ పురుషునిగా , ధర్మనాథునిగా కొనియాడబడతాడు.